सर्लाही। सर्लाहीको लालबन्दी नगरपालिका–१ नवलपुरस्थित पूर्व–पश्चिम लोकमार्गमा भन्सार छली गरि ल्याइएको भारतीय नम्बर प्लेटको गाडी प्रहरीले नियन्त्रणमा लिएको छ।
जिल्ला ट्राफिक प्रहरी कार्यालय सर्लाहीबाट खटिएको टोलीले बिहान करिब ९:३० बजे BR 30 AK 7220 नम्बरको भारतीय स्कोर्पियो गाडी जाँच गर्ने क्रममा कुनै भन्सार कागजात नदेखाएको र चालकले मापसे गरेको अवस्थामा फेला पारेपछि कारवाही अगाडि बढाइएको थियो।
प्रहरीले कागजात र वैकल्पिक चालक बोलाउन अनुरोध गरेपछि चालकसहित गाडीमा सवार चार जना व्यक्ति गाडी त्यहीँ छाडेर फरार भएका थिए।
शंका लागी गाडी नियन्त्रणमा लिएर थप अनुसन्धान गर्दा जिल्ला प्रहरी कार्यालय सर्लाही र इलाका प्रहरी कार्यालय लालबन्दीको टोलीले जनप्रतिनिधि र स्थानीयको रोहबरमा गाडीको तलासी लिएको थियो। तलासीका क्रममा गाडीको इन्जिन भागमा प्लास्टिकले बेरेको झोलाभित्र गम्छाले बेरेर राखिएका धातुका गरगहना, चाँदीका सामग्री र नगद गरी करिब १५ लाख रुपैयाँ बराबरको सामान फेला परेको हो।
गाडी र बरामद गरिएका सामग्रीहरू भन्सार छली तथा चोरी पैठारीको आरोपमा आवश्यक कारबाहीका लागि सर्लाही भन्सार कार्यालय मलंगवामा पठाइएको प्रहरीले जनाएको छ।
