सर्लाही । नेपाल कुशवाहा कल्याण समाज जिल्ला कार्यसमिति सर्लाहीको आयोजनामा भव्य र गरिमामय वातावरणमा साधारण सभा, सम्मान तथा छठ पर्वको शुभकामना आदानप्रदान कार्यक्रम सम्पन्न भएको छ। सर्लाही जिल्लाको बरहथवा नगरपालिकाअन्तर्गत रहेको कुशवाहा धर्मशालामा आयोजित उक्त कार्यक्रम सामाजिक एकता, सांस्कृतिक पहिचान र सामुदायिक गौरवको प्रतिकका रूपमा सम्पन्न भएको हो।
कार्यक्रममा समाजका जिल्ला अध्यक्ष श्री लक्ष्मण कुशवाहाको सभाध्यक्षता र नेपाल कुशवाहा कल्याण समाजका केन्द्रीय वरिष्ठ उपाध्यक्ष तथा पूर्व माननीय श्री उपेन्द्र कुशवाहाको प्रमुख आतिथ्य रहेको थियो। कार्यक्रममा विभिन्न तहका जनप्रतिनिधि, बुद्धिजीवी, शिक्षाविद्, समाजसेवी, व्यवसायी तथा कुशवाहा समुदायका अग्रज व्यक्तित्वहरूको उल्लेखनीय उपस्थिति देखिएको थियो। सहभागीहरूको उत्साह, एकता र समर्पणले कार्यक्रमलाई ऐतिहासिक र प्रेरणादायी बनाएको थियो।
कार्यक्रमका विशिष्ट अतिथिका रूपमा माननीय जवाहरलाल कुशवाहा, बलरा नगरपालिकाका मेयर श्री रामाशंकर कुशवाहा, केन्द्रीय सचिव तथा सामान्य प्रशासन अधिकृत श्री भरत कुशवाहा, साथै समाजका केन्द्रीय, प्रदेश र जिल्ला स्तरका पदाधिकारीहरूको उल्लेखनीय उपस्थिति रहेको थियो। अतिथिहरूले समाजको सुदृढीकरण, एकता र शैक्षिक प्रगतिका लागि निरन्तर प्रयासरत रहनुपर्नेमा जोड दिएका थिए।
उक्त अवसरमा समाजका अग्रज, इमानदार र सेवाभावी व्यक्तित्वहरूलाई विशेष सम्मान प्रदान गरिएको थियो। विशेषगरी, सामान्य प्रशासन अधिकृत श्री सुनिल कुमार कुशवाहालाई नासु पदबाट अधिकृतमा पदोन्नति प्राप्त गरी प्रशासनिक सेवा र जनकल्याणका क्षेत्रमा उल्लेखनीय योगदान पुर्याउँदै आएको सम्मानमा प्रशंसा पत्र, दोसल्ला र माला लगाएर सम्मान गरिएको थियो। उहाँको कर्मनिष्ठा, समाजसेवा र इमानदारीपूर्ण कार्यशैलीको सबै अतिथिहरूले प्रशंसा गरेका थिए।
त्यसैगरी, कुशवाहा बुद्धिजीवी समाजका उपस्थित सम्पूर्ण केन्द्रीय पदाधिकारीहरूलाई पनि समाजप्रतिको निरन्तर योगदान, बौद्धिक नेतृत्व र संगठन सुदृढीकरणमा महत्वपूर्ण भूमिका खेलेको कारण सम्मान प्रदान गरिएको थियो। सम्मान ग्रहण गर्दै वक्ताहरूले कुशवाहा समुदायको शैक्षिक, सामाजिक र आर्थिक उत्थानका लागि आफूहरू सधैं अग्रसर रहने प्रतिवद्धता व्यक्त गरेका थिए।
कार्यक्रममा सहयोगी संस्थाको रूपमा कुशवाहा बुद्धिजीवी समाज जिल्ला समन्वय समिति सर्लाहीको उल्लेखनीय भूमिका रह्यो। सो समितिका सर्लाही जिल्ला अध्यक्ष श्री रामविश्वस कुशवाहा र उहाँको सक्रिय टिमले कार्यक्रमको सम्पूर्ण व्यवस्थापन, समन्वय र आतिथ्यका कार्यहरू अत्यन्त शालीन र व्यवस्थित ढङ्गले सम्पन्न गरेका थिए। अतिथिहरूले उहाँहरूको समर्पण, संगठनात्मक क्षमता र समाजिक प्रतिबद्धताको खुलेर प्रशंसा गरेका थिए।
कार्यक्रमका दौरान वक्ताहरूले कुशवाहा समुदायको सामाजिक, आर्थिक र शैक्षिक प्रगतिमा केन्द्रित भएर सामूहिक रूपमा अगाडि बढ्नुपर्नेमा जोड दिएका थिए। उनीहरूले कुशवाहा समाज केवल एक जातीय संरचना नभई श्रम, इमान र एकताको प्रतीक भएको उल्लेख गर्दै, छठ पर्वले दिएको अनुशासन, पवित्रता र आत्मबललाई जीवनमा उतार्न सबैलाई आह्वान गरेका थिए।
प्रमुख अतिथि श्री उपेन्द्र कुशवाहाले सम्बोधन गर्दै समाजलाई एकीकृत ढङ्गले अघि बढाउन शिक्षा, संस्कार र संगठनको त्रिवेणीलाई मजबुत बनाउनुपर्नेमा जोड दिनुभयो। उहाँले युवा पुस्तालाई कुशवाहा समुदायको गौरवशाली इतिहास, आत्मसम्मान र पहिचान जोगाउँदै सामाजिक परिवर्तनमा अग्रणी भूमिका खेल्न आग्रह गर्नुभयो।
त्यसैगरी, मेयर रामाशंकर कुशवाहाले नगर विकाससँगै सामाजिक एकता र सहकार्यको महत्वबारे चर्चा गर्दै कुशवाहा समाजले स्थानीय विकासमा देखाएको अग्रसरतालाई सराहना गर्नुभयो। उहाँले स्थानीय सरकार सधैं समाजिक, शैक्षिक र सांस्कृतिक कार्यक्रमसँग सहकार्य गर्न तत्पर रहेको बताउनुभयो।
कार्यक्रमको अन्त्यमा छठ पर्वको पावन अवसरमा वक्ताहरूले एकता, सद्भाव, धार्मिक सहिष्णुता र पारिवारिक सम्बन्ध मजबुत बनाउने सन्देश दिएका थिए। सहभागीहरूले सामूहिक रूपमा “कुशवाहा एकता — समृद्ध समाजका लागि हाम्रो प्रतिज्ञा” भन्ने नारा उच्चारण गर्दै कार्यक्रमको समापन गरेका थिए।
कार्यक्रमको सञ्चालन समाजका जिल्ला सचिव तथा प्राध्यापक श्री वीरेन्द्रप्रसाद कुशवाहाले गरेका थिए। उहाँले सम्पूर्ण उपस्थित अतिथिहरू, सहयोगी संस्था, पत्रकार, दर्शक तथा सहभागीलाइ हार्दिक धन्यवाद ज्ञापन गर्दै कार्यक्रमलाई सफल बनाउन योगदान पुर्याउने सबैप्रति कृतज्ञता व्यक्त गर्नुभयो।
यसरी, बरहथवा नगरको कुशवाहा धर्मशालामा सम्पन्न सो कार्यक्रमले कुशवाहा समुदायबीचको आत्मीयता, एकता र सामूहिक प्रगतिप्रतिको प्रतिबद्धतालाई पुनः सुदृढ गर्दै समाजको गौरवपूर्ण इतिहासमा नयाँ अध्याय थपेको छ।
