राम विश्वास कुशवाहा । नेपाल कुशवाहा कल्याण समाज केन्द्रीय कार्यसमितिको आयोजनामा आगामी २०८२ साल मङ्सिर १० गते बिहीबारका दिन साधारण सभा तथा रक्तदान कार्यक्रम सर्लाही जिल्लाको लालबन्दीस्थित एभरेस्ट होटलमा आयोजना हुने भएको छ। उक्त कार्यक्रममा रक्तदान गर्न इच्छुक व्यक्तिहरूको नामावली माग गरिएको छ। सोही अनुरूप कुशवाहा समुदायभित्रबाट रक्तदान गर्न चाहने व्यक्तिहरूको नामावली तयार गर्न आग्रह गरिएको छ। यस महत्वपूर्ण कार्यक्रममा कुशवाहा समाजका जिल्ला कार्यसमितिका पदाधिकारी तथा सदस्यहरूलाई प्रतिनिधिमूलक रूपमा उपस्थित भइदिन समेत अनुरोध गरिएको छ। यद्यपि कार्यक्रम प्रतिनिधिमूलक रूपमा आयोजना गरिए तापनि यसको सामाजिक र मानवीय महत्व अत्यन्त ठूलो रहने आयोजक पक्षको भनाइ छ।
नेपाल कुशवाहा कल्याण समाजले विगतदेखि नै सामाजिक उत्तरदायित्व वहन गर्दै आएको उल्लेखनीय संस्थाका रूपमा परिचय बनाएको छ। यस संस्थाको आयोजनामा विगतका वर्षहरूमा एक हजार जनाभन्दा बढी व्यक्तिहरूले रक्तदान गरी नेपाल रेडक्रस सोसाइटीलाई रगत हस्तान्तरण गरिसकेका छन्, जसले असंख्य मानव जीवन बचाउन महत्वपूर्ण योगदान पुर्याएको छ। त्यसैगरी, विभिन्न मानव सेवा आश्रमहरूमा निःशुल्क भोजन दान, समाजमा रहेका विपन्न तथा गरिब वर्गका व्यक्तिहरूलाई लत्ता–कपडा वितरण, निःशुल्क स्वास्थ्य शिक्षा कार्यक्रम, निःशुल्क सीप तथा तालिम सञ्चालनजस्ता मानवतामूलक र कल्याणकारी कार्यहरू निरन्तर रूपमा गर्दै आएको समाजले जानकारी दिएको छ।
आगामी साधारण सभा तथा रक्तदान कार्यक्रम नेपाल कुशवाहा कल्याण समाजका राष्ट्रिय अध्यक्ष श्री राकेश मेहताको अध्यक्षतामा सम्पन्न हुने जनाइएको छ। कार्यक्रममा समाजका केन्द्रीय तथा जिल्ला तहका पदाधिकारीहरू, विभिन्न क्षेत्रका गण्यमान्य व्यक्तित्वहरू, बुद्धिजीवी, समाजसेवी तथा समुदायका अग्रज व्यक्तिहरूको उल्लेखनीय उपस्थिति रहने अपेक्षा गरिएको छ। यस कार्यक्रममार्फत समाजभित्र एकता, सहकार्य र सेवाभावलाई थप सुदृढ बनाउने लक्ष्य राखिएको छ।
कार्यक्रमको बारेमा जानकारी दिँदै नेपाल कुशवाहा कल्याण समाजका केन्द्रीय सचिव तथा सामान्य प्रशासन अधिकृत श्री भरत कुशवाहाले कार्यक्रम प्रतिनिधिमूलक रूपमा आयोजना गरिए तापनि यसको सामाजिक उपलब्धि अत्यन्त ठूलो रहने बताउनुभएको छ। उहाँले रक्तदान मानव जीवनसँग प्रत्यक्ष जोडिएको महान् सेवा भएको उल्लेख गर्दै कुशवाहा समुदायका सबै सक्षम व्यक्तिहरूलाई यस पुण्य कार्यमा सहभागी भइदिन आग्रह गर्नुभएको छ। साथै, समाजले भविष्यमा पनि यस्ता सामाजिक, शैक्षिक र स्वास्थ्यसम्बन्धी कार्यक्रमहरू निरन्तर रूपमा सञ्चालन गर्ने प्रतिबद्धता व्यक्त गरेको छ।
