राम विश्वास कुशवाहा, बिराटनगर । नेपाल कुशवाहा कल्याण समाज मोरङ जिल्लाको ८औं जिल्ला अधिवेशन शनिबार एक भव्य समारोहका साथ सम्पन्न भएको छ। अधिवेशन जिल्ला अध्यक्ष हरिनारायण कुशवाहाज्यूको अध्यक्षतामा तथा समाजका केन्द्रीय अध्यक्ष राकेश मेहताज्यूको प्रमुख आतिथ्यतामा सम्पन्न भएको हो।
अधिवेशनमा केन्द्रीय उपाध्यक्ष राजकुमार सिंह, उपाध्यक्ष मनोज सिंह, महासचिव जयप्रकाश महतो, केन्द्रीय सचिव भरत महतो, केन्द्रीय सदस्यलगायतको विशेष उपस्थिति रहेको थियो। कार्यक्रमको सभाहल खचाखच भरिएको थियो भने सहभागिता र उत्साहले अधिवेशनलाई ऐतिहासिक र उपलब्धिमूलक बनाएको सहभागीहरूले बताएका छन्।
प्रमुख अतिथि राकेश मेहताले आफ्नो सम्बोधनमा मोरङ अधिवेशनलाई ऐतिहासिक माइलस्टोनका रूपमा चित्रण गर्दै सम्पूर्ण सदस्यलाई संगठनप्रति अझ एकजुट र समर्पित रहन आग्रह गर्नुभयो। उहाँले कुशवाहा समाजलाई “राष्ट्रिय एकताको बलियो आधार” बनाउनुपर्नेमा जोड दिँदै सामाजिक उत्थान, शिक्षा, संस्कृति र राजनीति सबै क्षेत्रमा सक्रियरूपमा योगदान दिन आवश्यक रहेको बताउनुभयो। अध्यक्ष मेहताले विगतमा हासिल भएका उपलब्धिहरूलाई थप संस्थागत गर्दै भावी यात्रामा “काँधमा काँध मिलाएर अघि बढ्ने” स्पष्ट सन्देश दिनुभयो। साथै उहाँले अधिवेशनकै अवसरमा आउँदो हरितालिका तीज पर्वको शुभकामना व्यक्त गर्दै, तीजले दिदीबहिनीहरूको सामाजिक एकता, सांस्कृतिक सौन्दर्य र आपसी सद्भावलाई झनै मजबुत बनाउने विश्वास व्यक्त गर्नुभयो।
त्यसैगरी, केन्द्रीय सचिव तथा नेपाल सरकारको सामान्य प्रशासन अधिकृत भरत कुशवाहाज्यूले आफ्नो शुभकामना मन्तव्यमा मोरङ जिल्लाको सामाजिक, शैक्षिक र आर्थिक प्रगतिका लागि समाजका सबै सदस्यहरूलाई सामूहिक अभियानमा जोड दिनुपर्नेमा जोड दिनुभयो। उहाँले कुशवाहा समाजसँग “जातीय उत्थान र सामाजिक सद्भाव कायम राख्ने शक्ति” रहेको बताउँदै, “काँधमा काँध, हातमा हात मिलाएर अघि बढे मात्र संगठनले लक्ष्य हासिल गर्नेछ” भन्ने विश्वास प्रकट गर्नुभयो। सचिव कुशवाहाले पनि अधिवेशनकै अवसरमा सम्पूर्ण दिदीबहिनीहरूलाई तीज पर्वको हार्दिक शुभकामना दिँदै, महिलाको सम्मान, अधिकार र योगदानलाई समाजले अझ उच्च स्थान दिनुपर्नेमा जोड दिनुभयो।
कार्यक्रममा अन्य वक्ताहरूले समेत नेपाल कुशवाहा कल्याण समाजले विगतमा गरेको योगदानको प्रशंसा गर्दै, भावी दिनमा अझ ठूला उपलब्धि हासिल गर्न सक्ने विश्वास व्यक्त गरे। उनीहरूले समाजले शिक्षा, सामाजिक चेतना, सांस्कृतिक उत्थान र राजनीतिक सहभागितामा अझ ठूलो भूमिका खेल्ने अपेक्षा राखे।
बिराटनगरमा सम्पन्न अधिवेशनले समाजभित्र नयाँ उत्साह र एकताको सन्देश दिएको छ। केन्द्रीय नेतृत्वको प्रेरणादायी भनाइ र मार्गनिर्देशनले मोरङ जिल्ला मात्र नभई सम्पूर्ण कुशवाहा समुदायलाई संगठित, सबल र प्रगतिशील बनाउन महत्वपूर्ण योगदान गर्ने विश्वास व्यक्त गरिएको छ।
अधिवेशन सफलताको अवसरमा कुशवाहा बुद्धिजीवी सेवा समाज जिल्ला समन्वय समिति सर्लाहीले कार्यक्रमको सफलताको शुभकामना व्यक्त गरेको छ। बुद्धिजीवी समाजका अध्यक्ष राम विश्वास कुशवाहाले समेत दिदीबहिनीहरूलाई हरितालिका तीजको शुभकामना दिँदै, तीजले एकता, सद्भाव र सांस्कृतिक जीवन्ततालाई झनै सबल बनाउने उल्लेख गर्नुभएको छ। उहाँले यो शुभकामना आफ्नै फेसबुक स्टाटस मार्फत सर्लाही जिल्लाबाटै सार्वजनिक गर्नुभएको हो।
यसरी मोरङ जिल्लाको ८औं जिल्ला अधिवेशनले केवल संगठनात्मक गतिविधिमा मात्र होइन, सांस्कृतिक र सामाजिक पक्षमा पनि सशक्त सन्देश दिएको छ। अध्यक्ष राकेश मेहता, सचिव भरत कुशवाहा र अन्य नेताहरूको मार्गनिर्देशनले सम्पूर्ण समाजलाई आगामी यात्रामा अझ ऊर्जाशील र दृढताका साथ अघि बढ्न प्रेरणा प्रदान गर्ने विश्वास लिइएको छ।
